♤زجل♤ 

الَمسيرَة الخَضْراءْ قِصَّة حُبْ ؤُوْفا

~~~~~~~~~~~~~~~~ 

المَسيرَة الخَضْراءْ

ياقوتَة أعيادْ المغرِبْ

قَصَّةْ مْحَبَّة صْفَا بَالوْفا

بينْ مَلِكْ ؤُشَعْبْ

تْمَنِّيتْ نْعاوَدْ نْعيشْها

مْحَمَّسْ وْأَنا تِلْميذْ

كُلْ يوم نهتفو وَحْنا

أَطْفالْ عاشَ المَلِكْ

وَالصَّحْراءْ مَغْرِبية 

حُرَّة ؤُغاتَبْقا مَغْرِبيَة

فْ كُلْ عامْ مَغْرِبْنا

يَحْتافَلْ بْنَوَّارَةْ الأَعْيادْ

عيدْ الْمَسيرَة الخَضْراء

الْغالي فَخْرْ عَزْنا

مَسيرَةْ مَلِكْ هُمامْ

عَبْقَري ؤُشَعْبْ بارْ

تْوَحَّشْتْ تَرْجَعْ يَّامْها

الزِّينَة العْزيزَة 

نْعيشْها بَحْلاوَتَها

مْعَشْقَة حَماسْ مْوَرَّثْ

الله الله لْديكْ الأَيَّامْ 

الْغالْيَة مَنْ حُبْ الْوَطَنْ

مْنينْ سْمَعْنا خِطابْ

مَلِكْنا المَرْحومْ الحَسَنْ

تْهَزَّاتْ الگْلوبْ مْشَمْرَة

تْلَبِّي نِدَاءْ سيدْنا

الكُلْ يَهْتَفْ عاشْ المَلِكْ

وَالصًّحْراء مَغْرِبيَة حْبيبَة 

ذِكْرَياتْ عَزْ غالْيَة 

مْجادْ مَلِكْ وْشَعْبْ 

ضَرْباتْ المَثَلْ فْ كُلْ

الدُّنْيا عَرَبْ ؤُعَجَمْ

حَيْراتْ الْعْدا احْقادْهُمْ

وْدارَتْ الفَّامْهُمْ الْجامْ 

وَخَّا يْضَلُّو يْكَذْبو تَخْرافْ

الكُلْ عْرَفْهُمْ بَمْكَرْ الخْديعَة 

سَوْلو السَّاقْيَة الْحَمْراء

ؤُوادْ الذَّهَبْ مَغْربيتْهُمْ

مْجَدْرَة أَصْلْ مْفَرَّع جْبالْ

تاريخْ العَزْ مْزَمَّمْ رْسومْ

قْبايَلْ صَحْرانا تَشْهَدْ

بيعَة الوْفا مْوَرْثَة سَلْسالْ

سَوْلو أهْلْ الشِّيخْ ماءْ العِنينْ

والرْگيباتْ وْأَيْتْ بَلاَّ

وَوْلادْ دْليمْ وَوْلادْ عَمْرانْ

وَوْلادْ تيدْرارينْ وَالزَّرْگِيينْ

وَالعْروسِيينْ وْأَهْلْ الطَّالَبْ وْغيرْهُمْ

الكُلْ مْغارْبَة مْبايْعينْ العَتْبَة الشْريفَة

بيعَتْهُمْ سَلْسالْ مْجَدَّرْ

مَنْ السَّاقْيَة الحَمْرا لَلْوادْ الذَّهَبْ

سَوْلو راسْ بوجْدورْ

وَضْهَر الرْگيباتْ 

ؤُوادْ ميرانْ وْگارًةْ تْمَرْ وَمْگالَة 

سَوْلو الرَّگْ ؤُوادْ بَنْ دَكَّة

وْگارَةْ البْكاري 

سَوْلو الحْماداتْ والغْشيواتْ 

والزَّاگْ وْكُلْ شْبَرْ مَنْ صَحْرانا 

يَهْتَفْ مَغْرِبْنا المْجَدْ بْناسْها الجْميلَة

مْنْ طنجة الگْويرة

يَدْ واحْدَة  مْبايْعَة السَّادَسْ

مَلِكْنا الهُمامْ جْوْهَرَة

الأَعْتابْ الشْريفَة لَلْوَطَنْ

بَيْعَتْنا مَوْروثَة أَجْيالْ

لَلْمُلوكْ الدَّوْحَة الْعَلَوِيَة

عَهَدْنا واحَدْ ما نْفَرْطو

فْ حَبَّة مَنْ صَحْرانا  

وَخَّا يْقَطْعونا أَطْرافْ

راهْ مْحَبَّتْ الأَوْطانْ مَنْ الإيمانْ

نَفْديكْ يا صَحْرانا  الْعزيزة 

بَالرُّوحْ وَالدَّمْ والأَهْلْ

وَيَبْقى شِعارْنا مْخَلَّدْ

عز من طنجة  لگويرة

اللهْ الوطنْ الملكْ 

★بقلم ذ.محمد حديش م.ج.ح★