( المطبلاتية ) :
أنا ما لييش في ساحتكو مكان
التطبيل له أهله وناسه
أصل ماليش انا في الألحان
إنتوا أصحابه وإنتوا أساسُه
علشان جد وماشي ف حالي
وماليش في الهيصة والتهليل
مش راح يعجبكم موالي
على معدتكوا كلامي تقيل
وإنتوا تحبوا الكلمة الرايجة
مرة شمال واهي مرة يمين
وانا مالييش في الموجة الهايجة
انا موزون وكلامي رصين
عمري ف يوم ما هسقف ليكوا
ولا ازغرد بالكدب نفاق
ولا راح اقول تسلم اياديكوا
للي ما يعرف ألِفُن باء
أصل الطبلة مسيرها تفرقع
م الخبط وكتر التطبيل
وساعتها مفيش طبل هينفع
ولا راح ينفع عيني يا ليل
دوَّر ع اللي وراك بيطبل
راح تلاقيه راح مسرح تاني
يوم بيبحَّر يوم بيقَبِّل
مصلحته ع الشط التاني
بحمد ربي ع اللانا فيه
مصلحتي مش ع المخلوق
زُهد الدنيا ف قلبي ماليه
واهدي الورد لأهل الذوق
زُهد الدنيا ف قلبي ماليه
واهدي الورد لأهل الذوق
جمال زكي عينر
ليست هناك تعليقات:
إرسال تعليق