/ زهر الجلنار/
==========
فتح زهرك يا جلنار ٠٠
فتح الله وأكبر
===========
طلت شفتا بوجه مليح٠٠
بشال وع خصرا زنار٠٠٠
نور جبينا صار يزيح ٠٠٠
عتم الليل وصار نهار٠٠٠
لما شفتا بأرض الدار٠٠٠
ع خدودا الورد مزهر٠٠٠
كتبت حروفا جوى القلب٠٠٠
وحفظتا متل الأسرار٠٠٠
طلت تتغاوا بحالا٠٠٠
عيني ماحلا جمالا٠٠٠
سلبت قلبي بدلالا٠٠٠
بمشيا وهي بتتمختار٠٠٠
يا الله ما احلا العيون٠٠٠
والحاجب سيف المسنون٠٠٠
ترجيتا لتبقى هون٠٠٠
قالت رح كفي المشوار٠٠٠
مشوارا طال عليي٠٠٠
زاد بقلبي الحنية٠٠٠
يارب شقد غالية٠٠٠
هالأم التوب الأحمر٠٠٠
نطرت رجوعا كل الليل٠٠٠
حسيت بليلا ثقيل٠٠٠
جسمي ع غيابا عليل٠٠٠
هالأم الخال وأسوار ٠٠٠
نطرت رجوعا بعد غياب٠٠٠
بأخر تموز بأول آب٠٠٠
جتني طرقة فتحت الباب٠٠٠
هللت بأغلا الزوار٠٠
عطرا فاح بهالديري٠٠٠
أم القامة القاصيري ٠٠٠
عشقتا صغيري وكبيري٠٠٠
وبعشقا كل الاعزار٠٠٠
الدليبة مرتعها ومصياف٠٠
منسوجة بكل الأطياف٠٠
جهرت بحبا ولا مابخاف ٠٠٠
لو حبا جاب الأوزار٠٠٠
خضر علي بن عزيز٠٠٠
ناظمها من غير تعجيز٠٠٠
بهديها من غير تمييز٠٠٠
لأهلي وكل الأبرار٠٠٠
فتح زهرك يا جلنار ٠٠٠
/ فتح الله وأكبر/
بقلمي ٠٠٠
خضر عزيز علي ٠٠٠سوريا ٠٠٠حماه ٠٠٠مصياف ٠٠٠الدليبة
ليست هناك تعليقات:
إرسال تعليق