i( تعبت خلاص انا المصري )
أنا الغلبان وانا المقهور
ونفسي عيني تشوف النور
ونفسي بس أعيش مستور
واشوف الورد فى خدودك
دانا ساقك أنا عودك
وانا شايلك على كتافي
وليه حرماني من جودك؟
وليه الكل فيكي حزين؟
وإنتي يامصر ضي العين
وليه فيكي نعيش تايهين؟
ورماينه ورى سدودك
وليه يا بهية حرمانة؟
وإنتي عايشة جوانا
وتمدي إيدك للغريب
واحنا اللي عايشين على أرضك
وبنحافظ على حدودك
وبنحافظ على ودك
نشيل الدمع من خدك
وواكلا علينا ميراث جدك
ياأمي خديني فى حضنك
كفاية حرمان أنا فى عرضك.
تعبت خلاص من بعدك
ومن هجرك ومن صدك
زرعت فيكي تقاوي الخير
ومحروم من ثمار أرضك
ورافض البعد عن حضنك
لأني يا مصر أنا بحبك
أنا ولدك وأنا سندك
وأنا العاشق تراب أرضك
وأفديكي بنور العين.
وروحي تهون واصون عرضك.
ولو مالك زمام الكون
أعيش وأموت على أرضك
وحبك نهر فى قلوبنا
بيطرح زهر في صدرك
أنا اللي شربت من نيلك
وانا اللي دافعت عن أرضك
ياريت تمديللي ايديكي
تعبت خلاص انا فى عرضك...
الأديب والشاعر
د/فوزي سليم. مصر
ليست هناك تعليقات:
إرسال تعليق