أول حضن منك ياامي
كان بعد سنوات من عمري
كبرت وسافرت ورجعت
حضنتني أخيرا،اتحقق حلمي
أني اعرف ايه معنى حضن الام ،ايه يعني
اني افهم كلام الناس في عيد الأم ،ليه بتغني ؟
أني اشتاق لكلمه امي وقولها في وجعي أو يبقى لها معنى تاني
أمي كانت بتشوف الحنان خيبه ،وقله ربايه
والحضن والخوف علي ، يعلمني الكسل وقله القيمه وهكون غبيه
امي كانت بتقول ،خليكي ناشفه ماتكونيش خايفه ولا تطلبي حنيه
لما كنت بتوجع من الدنيا برجع لها بتيديني ألم تاني يفوقني
تقولي الدنيا مش للضعيف والتربيه أساسها قسوه وتكليف
بلاش كلام خايب ، أمي بتعامل بنفس الطريقه القرايب
حتى للي يكلمها عني تقوله ماتضيعوش تربيتها خليها تنشف خليها قاسيه
كان نفسي اقولها ياامي انتي ليه غير الامهات ليه جايه علي ؟
تربيتك جميله ،واهو مؤدبه واهو استحملت مرار الغربه وظلمها بس ميته وفي جراحي صاحيه
ياامي ،حضنك كان هيهون علي ويفرق كثير معاي
ياامي كان هيقويني وكنت هبقى اقوى بحبك بدل دموعي وأساي
انا عشت يتيمه ،ومعاي امي ،الناس فاكره وجود أمي كفايه
امي موجوده بس طول عمري وحدي فيتمي عمرها ماكانت معاي .
ربنا يسامحك ياامي فكرتي فالربايه،كنت محتاجه منك شويه حنيه .
لبنى صايل
ليست هناك تعليقات:
إرسال تعليق