فاض الكأس 

فَضَلْنَا الَبْطُونْ عَلَى الَعْـقُـولْ

تَبَـعْـنَا ظَنُون عَلَى الْمَعْـقُـولْ

أمَشِينَا فَهَذْ طَبِيعَة الْعَوْجَـة

فَـقَـدْنَا الْـمَضْـمُـونْ فَالْـقُـولْ

ارْضينَا بَالْهُونْ مَنْ الَفْـسُـولْ

أبَـقِـينَا عَنَدْ مَنْ وَالَى فُرْجَـة

سَدَلْـنَا الَجْفُونْ مَنْ الَخْمُـولْ 

غَـمَـضْنَا الَعْـيُونْ عَلَى طـول

رَجَعْنَا وَرَاء شَحَالْ مَنْ دَرْجَة

تَـزْرَعْ الَـفْـتُونْ مَنُه الَحْقُـولْ

يَبَـسَتْ الَغْصُونْ فَالْمَحْصـُولْ

خَرَجْ مَنْ الَحَرَثْ نَـبْةَ مَرْجَـة

تـَغَـيَــرْ الْلُــونْ مَـنْ الأصُـولْ

سَيْطَرْ الْمَجُونْ عَلَى الَغْـفَـولْ 

مَا عَرَفَـنَا مَنِينْ هِـي لْخَرْجَـة

اخْـذِيـنَا الأُمُـورْ فِي لَـمْــزَاحْ 

تَـوَهَــمْ لَـغْـرُورْ فِي لَـطْـمَـاحْ 

ظَـهَرَتْ الَـعْيُوبْ مَنْ جَـهَـالَـة

صَـنَـعْـنَا جُـسُـورْ مَنْ لَـوْقَـاحْ

زَادَتْ الـشْـرُورْ مَـنْ الـطْـلاَحْ

وَصَلَتْ الَافْكَـارْ لَحَدْ الرْذَالَـة

شَـهَادَةْ الـزُورْ فِي الْـمَـصَـاحْ 

خَـرَجْ الـشُـورْ مَنْ الـنْــصَـاحْ

نَاسْ ابْـغَاتْ تَغْنَى بَالْعَجَـالَـة

تَكْشَـفْ الْمَـسْتُورْ بَالْـفْـضَـاحْ 

أصْـبَـحْ الَـفْـجُورْ فالْـمُـوبَـاحْ 

الْعَـرَضْ رَخِيصْ فِي الدْلاَلَـة

الَـقْـلُـوبْ صَخُورْ مَنْ صَفَـاحْ

مَـاتْ الـشُعُـورْ فِـيهَا قَـسَـاحْ

ضَاعْ كُـلْ شِي فِي الـضَلاَلَـة

تَـقِيِيمْ النْحَاسْ عَلَى الذَهَـبْ

هَـرَبْ الْـقِـيَاسْ مَنْ لَـعْـجَـبْ

أَخْـفَـى كُلْ شِي لِـيهْ قِـيَـمَــة

تَقْـطَعَتْ الأنْفَاسْ مَنْ الَغَلَـبْ

مَـاتَـتْ الَاحْـسَـاسْ فَالْـقَـلَـبْ

مَـا أبْـقَى فِي الْـعَـهَـدْ كَـلْـمَـة

تَـعَوَدَتْ النَـاسْ علَى الْكَـذِبْ

سَــقَــطْ اَسَــاسْ مَـنْ الأدَبْ

تَـعَـرَى الَحْيَـاء مَنْ الَحُـرْمَـة

شـَابْ الـرَأَسْ مَـنْ لَـغْـضَـبْ 

فَـاضْ الْـكَـأسْ مَـنْ الـذَنَـبْ

تَـنَزَعَتْ مَـنْ جُوفْ الرَحْمَـة

حَرَمْ الـنْـعَاسْ مَـنْ الـرُعَـبْ

دَخَلْ الْوَسْوَاسْ مَنْ الْكَـرَبْ

غَابَتْ مَـنْ الَوْجُوهْ الْبَـسْمَـة

 بقلمي ............................عبد الكريم بركة