قلوب الناس ب تتشابه

فى تكوينها.. 

ف شرايينها ولون الدم..

قلوبنا كلها حَمرَه..

وفيها إسود وجواه سم..

وفيها قلوب كما الجمرة..

أُذين وبطين.. 

يضُخُّوا الدم 

فى الشرايين..

ف ياخد دَورِتُه

و يرجع......

ويرتاح لحظة

فى المنبَع..

يدُق القلب..

ف يرجع دمِّنا للغُلب

ويرجع قلبنا ل الضَخ

يفوت ع المُخ

يمِدُّه ب الغذا المطلوب

أكسچين،،ڤيتامين،،بروتين

وينزل تانى ف الشرايين

ينَفِّذ عَقد مش مكتوب

ك جُندِى من جنود الله

ويوهِب للبشر دى حياة

كأنه ف شغل

لا بيتعب ولا ب يكِلّ

لا ب يزهق ولا ب يمل

ينفذ وعد.. 

يكمَّل فى الخلايا

الأيّض

وتتجدِّد خلايا الجسم

يفوت ع الكبد

يهاجم ب الكرات السم

ت فَتِت كل ذرة دهن

كرات بيضا كأنها أمن

عُمَّال بس من غير أجر

مأموره وصاينه السر

لا ليها راحات

ولا أجازات...

تِجَمَّعها ل آخر العمر..

خلية نحل من 

غير صوت...

ب تنهى الخدمة

لمَّا نموت...

ونصبح روح..

تعيش أرواحنا

من غير قلب..

وتتصَنَّف نوعين إتنين

يا روح كارهه

يا روح ب تحب..

وياما ارواح 

حياها الحب..

وغيرها كتير كما 

الجثة..

ب ترعى ف جسمها 

العثة..

ماهيش حاسه

نَخَرهَا السوس

وياما السوس خَرَب

ف نفوس..

فَ نسيِّت ذادها 

ل الرحلة

سَقَط احساسها

فى الوَحلَه

ف شافت السعادة

فلوس...

وغيرها جَنِّتُه

فى السَتر

وغيرها عِزوِته صحة

لابسها تاج..

فَ عاش ف الدنيا

مش محتاج

وروحه عارفه مَطرَحها

وأرواح عايشه ف الأوحال...

ب تجمَع مال

حرام وحلال

فارقها النوم

وراحة البال

جحود وذنوب..

قلوب عاصية

ومش ب تتوب

وناس فاكرة

ماهيش ناسية

ب ان المولى

رب قلوب...

فَ عاشت عمرها

راضية

ب نفوس هادية

وراضية تملِّى

ب المكتوب

هداها الله

فَ عاشت نفسها

ت لقاه

و وهبتها طاعتها

حياة

فَ كان الموت

بداية عُمر

عشان الأمر كان لله

و لله وحده بس

الأمر

      د/نشأت عادل