ياحبيبتى قومى جى
ومسحراتى جى
حالف يصحيكى
ويلف حواريكى
بيدق ع الطبله
بينادى بمحناهده
ياعبد الاله اصحى
الست مش نايمه
مستنيه لزغده
تصحى وتسندنا
حتى النفير ساكت
مستنى انفاسك
تبدر حاراتها عيال
ويولعوا الفوانيس
عاشت سنين طافيه
مستنيه الشمعه
والمادنة محتاجه
سلالمها متسابه
عايزة اللى يطلع ليها
وينور لياليها
يدن اوان الفجر
يبدر وشوش صاحيه
وينادى الله حى
يسقينا حبة ضى
تقوى عيدانا ربيع
وتنور الفوانيس
بدل الشموع مصابيح
ومسحراتى فصيح
مش همه غير لقمه
مش قادر يصحيكى
ويدوقك لقمه
اللى ضناها الفقر
واللى حناها الهم
احنا من المحنه
عندانا ياساقيه
واقفه مابتلفيش
هوه احنا وش مافيش
يدارا منا العيش
ولا حتى نص رغيف
نسقى بيه فى الشاى
يامسحراتى بلاش
صحى كتير أمرا
اوعاك تصحى فقير
سيبه وماتصحهوش
سيب العيال بتنام
لحسن قرسها الجوع
خايف لا يوم تصحى
ذنبك على جنبك
والذنب هيزيد زنبك
وان فكروا يصحوا
هيشمروا وياكلوك
٠٠٠٠٠٠٠٠٠٠٠٠٠٠٠٠٠
ياحبيبتى قومى جى
الباب اهو مفتوح
قوم ياللا ياتمام
افتحلها ميت باب
دى حبيبتي جايه هناك
قلتلها لازم تيجى
وف وسطنا رح تيجى
وسع ياعم الضى
سابق ملامحك جاى
عازمك تشوفينا
وتشوفى مين فينا
بيصد عنا الريح
ويطبطب المجاريح
هتلاقى فينا الجدع
مليون سلام للجدع
ابو ضحكة تشفى الوجع
بيلم م الامرا وبيدى للفقرا
ويبل فيهم ريق.
وبهدمه تخفى الضيق
يومها العضام تدفا
والضحكه ع الشفة
تبدر ساعتها حنان
والحب يملا الكون
هوه احنا ايه هنكون
غير حبة من طيفك
ياام الجمال والكون
طب بصى حبة يمينك
هتلاقى ست مصون
ولا اجمل الخواجات
ستات ومصريات
بيعمروا ف الكون
الست عامله فريق
بشباب يفك الضيق
بيسلح المرضى
ميهمهوش نفسه
يرميها حتى ف نار
بيوزعوا الفرحه
على كل وش عبوس
بيفرحوا الميأوس
وف ايدها كل فانوس
وينوروا حاراتك
شفتى يامصر ازاى
بنحب فيكى ازاى
بصى علينا وشوفى
بصى على الحضرة
ليست هناك تعليقات:
إرسال تعليق